Notes |
- #Générale#(Hemricourt, Miroir des Nobles, p. 8.)
A cely tems estoit un noble chevalier, nommei Rasse alle barbe, frère al comte de Domartin en Goyelle, quy portoit en son escu ou gonfanon à trois pendans, et al desoir trois aneles.
Chis chevalier cheyt, ne say pour queil forfait, en l'indignation de roy Philippe de Franche... et fust chi chevalier banni et dekachiez du royalme. Sy soit partit à très grant avoir et warniz de grant nombre de joweaz, de chevaz et de mayniez, vint sorjorneir à Huy; là il tenoit grant hosteit et avoit brakeniers, chiens et oiseaz à planteit, et sy aloit sovent en rivière, en gibier por ly solassier.
Si avint une fois qu'il estoit de matin aleys en gibière en la terre de Warfezée et environ l'eure de dynier, il oyt sonier la clokette delle l'évation en la capelle do chasteal de Warfezée; si cbevauchat telle part par veyor le sacrament; et luy deskendut, il entrat en ly capelle, en laquelle ly capelain de dit seignor de Warfezée célébroit la messe, et ly sires estoit moult révérement en sa fourme en grand dévotion : quant ly lévation fut faite, il regarda de costé ly, sy parchut le chevalier estrangne et l'envoyat tantost prier à dynier deleis ly, et chil l'otroyat. Sy que après la messe ly sire de Warfezée le prit par la main et le rechuyt moult honnorablement, en ly demandant de son estat, et tout parlant il le conduisit en la salle de sa forteresse, sy commandat à drechier les tables, et que ly belle Alys, quy estoit tous ses déduys, fuist aminnée pour ly chevalier estrangne à fiester. La damoiselle vient tantost al commandement son peire, et comme bien ensengnie, elle s'adrechat vers le chevalier gratieusement le fit bien vengnant et s'acointat de ly meurement et sagement comme bien endoctrinée. Ly bon sire de Warfezée les assiet ensemble, et fiestyat grossement de ses provisions et de grand lyéche de cuer l'estrangne chevalier et sa maynye, tant qu'il en fust tot merveilhez.
Quand ils furent sortis de dyneir et ils furent esbanoyes à plusieurs ébatements, ly ledit messire Rasse remerciat le saingnor de Warfezée et sa fille delle honneur et bonne compaignie qu'ils ly avoient faite; sy prit congié et soy partit déaz mult courtoisement, et al départir ly sire ly priat mult à certes qu'il le visentat toutefois que ses chemiens le porteroient celle part : car on. ne ly pooit fair mielz à plaisier que de ly visentier et fair bonne compaignie. Et il qui ja estoit sopris del amor ladite damoiselle Alys, ly ottroyat bonnement; et tant y repairat, que quand ils furent infourmeis ly uns del atre, que mariage soy fist entre le dit mons Rasse alle barbe de Domartin en Goyelle et la dite damoiselle Alys; et asseit tost preis de Warfezée, une tour et bon démorage environ et le fist appeler, en remembrance de ses prédecesseurs et de son lynage, Domartin. (Hemricourt, Miroir des Nobles, p. 8.)
|