| Notes |
- #Générale#Extrait du Miroir des Nobles de Hesbayes de jacques Hemricourt:
215. Veriteis est que chilh de Duras sont de grande antiquiteit estrais de princes, car ilh yssirent do
conte Gilhebiert de Duras, qui fut sires de Gemblouz et de Jodongne, sires de Rochefort et de
Walecourt, sires de Cleiremont, d'Asteneur et de pluseurs atres vilhes; lyqueile conte ly evesques
Alixandres de Liege dekachat et weriat damageuzement pour les debas qu'il orent ensemble, à caze
des oppressions qu'il faisoit alle engliese et al paiis de Liege, ensy que par les coronikes de Saint
Lambier vos porat apparoir. Mais chis Gilhebiers fut ly dierains qui portat nom de conte, tant que
Duras. Ilh vendit Jodongne et Gemblouz et morit sains hoir, sy que si proismes depechont ses atres
terres; dont ly uns demorat sires de Duras, et ly atres fut sires de Rochefort et de Walecourt, et ly
atres sires de Cleiremont et s'apelat conte de Cleiremont, et y out trois contes l'unk après l'atre;
mais, finalement, furent encors ces terres departiiez entre les hoirs, sy que ly terre de Rochefort et
de Wallecourt demorat à on membre, et ly terre de Cleyremont, d'Asteneur et d'alconnes atres
demoront ensemble. Et puys sy departit ly sires de Cleiremont si largement de ses biens alle engliese
delle Vaz Saint Lambiert que sy hoirs demoront simples chevaliers. Et ly fortreche et ly terre de
Duras, tant soilement demorat à on atre. Chis contes de Duras portoit de geules à une aygle d'argent
et crioit Duras; et ces armes sont demoréez à ceaz de Cleiremont juxes à present, mais ilh crient
Walecourt. Et ly sires de Rochefort cangat les coleurs, car ilh prist d'or à une aygle de geules, le
beche et les piiez d'azure, et cangat assy le cry de Duras, car ilh criat, et encors font ly hoirs,
Wallecourt. Ors deveis savoir que ly terre de Duras alat tant d'oyr en hoyr qu'elle demorat sains hoir
marle, et en estoit damme une jovene filhette tant soilement, laqueile fut mariée al dit monssaingnor
Johan de Noefcasteal, sy que, de part sa femme, ilh fut sires de Duras, et detinve les armes qu'il
avoit pris: de sable à fleur de lys d'or, et assy le cry de Domartien, qui leur est demoreis juxes à
present. De ly et de ses hoirs sont issus tuit chilhe de Duras qui sont à present. Et en sont ensevelis
quatre des saingnors de Duras en l'abie de Myle, deleis Sain Tron. Et deveis savoir que messires
Gerars delle Marche, chevaliers bannerés, fis legitimes do conte delle Marche, do secon mariage, et
oncles al evesque Adoulph delle Marche, qui morit evesques de Liege l'an mil IIIc et XLIIII, soy
mariat alle sereur do saingnor de Duras, adont vivant, qui en devant avoit esteit mariée al saingnor de
Bierlouz, doqueile promerain mariage estoit messires Gerars, sires de Bierlouz; et de cesty secon
mariage furent dois sereurs mult belles, car je les veys et compangnay sovent fois. Ly une de ces
sereurs fut mariée al genty voweit de Colongne, saingnor d'Alpen; s'en sont issus ly enfans d'Alpen
maintenant vivans, qui de longteups ont esteit annemis alle paiis delle evesqueit de Liege et sont
encors al jour d'uy ly plus fors tyrans qui soient entre Mouze et le Rins. Et ly atre sereur fut mariée
à monssaingnor Biertran de Liers, saingnor d'Emale et d'Embennes sor Gayre, chevalier, et en sont al
jour d'uy quatre enfans, assavoir Biertran, sires d'Emale, qui n'at nul hoir, Gerars, qui est rendus en
l'ordenne delle Tyexhe Maison, en la commenderie des Joins, et dois sereurs, qui sont nonnes de
Herkennerode, en la conteit de Louz.
|
Mari | M
Enfant 1 | M
Enfant 2 | M