| Notes |
- #Générale#Extrait du Miroir des Nobles de Hesbayes de jacques Hemricourt:
815. Chi devant, vous at esteit ordinéement declareit ly lingnie de monssaingnor Libiert, saingnor de
Geneffe, ainsneit fil monssaingnor Breton le viez de Warous; sy dirons, chi après, de monssaingnor
Hombier de Lexhy, secon fil do dit monssaingnor Breton. Chis portoit vairiet d'argent et d'azure à on
ourle de geules. Ilh fut ly chief et ly fleure de Hasbainge, et teilement est ilh intituleis sor sa pire, en
l'enclostre des Freires Escolirs à Liege; se morit l'an mil dois cens et xx, sy que là meïsmes vos porat
apparoir.
816. Ly dis messires Hombiers prist â femme damme Juwette alle Courte Coxhe, sereur al conte
Gerar de Hozemont; s'en furent siiez fis chevaliers, et un atre qui fut abbés de Saint Loren, et quatre
filhes chevalleresses, assavoir: messires Hombiers Coirbeaz, sires d'Awans, promerain de ce sornom,
messires Libiers Crepon d'Othéez, messires Ystasses, ly viez Frans Hons de Houllengnoul, messires
Anthones de Lexhy, dys le Moynes, messires Johan Locreaz et messires Gerars Petelhons de
Votemme; et, des sereurs, fut ly une mariée à monssaingnor Thomas de Puchey, ly atre à Elnoit, ly
tirche à Wonke, et ly quarte à Maruele deleis Saintron. Et chis siiez freires furent appeleis ly siiez
freires d'Awans viskans longtemps en grant poissance. Mais ilh furent traveilhies al temps Houwe
de Pirepont, evesque de Liege; car, à cely temps, assavoir l'an mil dois cens et XXIII, ly dis sires
d'Awans et sy freires et leurs aydans avoiient ars, anchois le commenchement des werres d'Awans
et de Warous, le cour de Lantins, appartenante az malades de Cornelhon, dont ly evesques deseurdis
et ly citeit de Liege furent mal contens; sy assegont le casteal d'Awans; dont ly capitles de Saint
Lambiert traitiiat une pais teile que ly sires d'Awans et cent chevaliers de son linage, en lieu
d'amende, alont à piet et deskaus delle porte Sainte Walbeure juxes en l'engliese de Cornelhon
releveir le crucefy, qui avoit esteit dependus pour ceste injure et koukiez enmy la dicte engliese juxes
à tant que ly forfais sieroit amendeit; et afrankyt les hyretages de Coirneilhon gisans desouz ly, et
rendit partie des domages, et, avoek ce, donat, à respondans pour ly de ceste pays inviolablement
tenir XII chevaliers de son linage, assavoir, sont: messires Badewiens de Geneffe, messires Robiert
de Lymont, ses freires, messires Bastiens de Houlgnoul, messires Wilhelmes, castelains de
Hozemont, messires Werys de Fontaines et messires Anthones de Fontaines, andois freires al dit
messire Wilhelme, monssaingnor Godefroid de Hambrouk, monssaingnor Libiert Crepon, freire à
luy, le dit saingnor d'Awans, monssaingnor Wery de Rocourt, monssaingnor Johan, son freire,
monssaingnor Renier de Vileir et monssaingnor Bastien, son freire, ensy qu'il appert en lettres sor ce
saiieléez qui sont avoekes les chatres des frankizes de la dicte citeit; car,en temps que je fuy maistre
de la dicte citeit, je les veys et lisis, et en pris le copie. Et ces chozes que je ay reciteit, ce at esté por
mon traitiet à proveir et assy affien que vous n'aiiez nulle admiration de ce qu'il avoit tant de
chevaliers en ce paiis, car, al jour delle daute deseurdicte, ilh avoit bin en l'evesqueit de Liege
demorans chink cens chevaliers, et teile nombre en fut bin armeit avoek le dit evesque et son paiis
alle warde de Steppes, encontre les Braybechons et le conte de Mouhaut, por vengier la violence que
ly dus de Braibant avoit faite à Liege. Ors retournerons à nostre mateire.
|
Masculin
Féminin
