| Notes |
- #Générale#Extrait du Miroir des Nobles de Hesbayes de jacques Hemricourt:
176. Chis bon chevaliers, nomeis ly secons messires Ystasses Persans, ainsneis fis do vielh et
promerain monssaingnor Persant, soy mariat alle filhe d'on noble bannerés en l'Eiffe, le saingnor de
Rulant, de laqueil ilh out unc fil et trois filhes. Ly fis fut nomeis messires Johans et fut sires de
Haneffe; se morut alle batailhe do Thier de Nyerbonne, deleis Huy, en service de ceaz delle citeit de
Liége, al encontre delle evesque Adulphe delle Marche et de cheaz de Huy. Chis secons messires
Persans fut veves delle damme de Rulant; sy soy remariat alle damme de Beazen, qui astoit veve et
tres noble damme, cuzine al duk de Loheraines, do linage de Remegny, dont ly bons Houwes de
Florines fut et chilh de Fangnoles assi. De ceste damme out ly secons messires Persans dois fis et
une filhe, assavoir Houwet d'Ochamp, qui fut ainsneis, et le bon monssaingnor Thiry, qui fut sires
de Seraing, delle succession monssaingnor Thiri Tabareal, son oncle, dont chi devant est faite
mention; et ly filhe fut mariée à monssaingnor Johan, saingnor de Gemeppe en Ardenne. Chis secons
messires Persans cangat les armes de ses predecesseurs et emprist tot promiers à porteir d'azure à
fleurs de lys d'argent; mais tousjours demoroit ly anchiens cry de Domartien.
|
