| Notes |
- #Générale#Extrait du Miroir des Nobles de Hesbayes de jacques Hemricourt:
175. Item, ly dis messires Thiris, sires de Haneffe, brisat les armes son peire d'on quartier des armes
de Mohaut, et est ensevelis az Freires Meneurs à Huy. Ilh fut bannerés et soy mariat alle filhe do
saingnor d'Erkle, en la dukeit de Geulres, qui astoit uns riches bannerés. Ilh orent on fil, nomeit
messire Ystasses, ly viez Persans de Haneffe, qui fut assy banneresse et fut forment riches et
poissans. Adont avoit ly sires de Jayche, en Braybant, qui estoit uns nobles bannerés, II filhes, dont
ly viez Persans de Haneffe deseurnommeis out une, et ly sires de Havereche, en Haynau, out l'atre.
Do viez Persant et delle damme de Jache yssirent dois fis, bannerés chevaliers, et V filhes, assavoir
ly secons messires Ystasse Persans, sires de Haneffe, et messires Thiris Tabareaz, sires de Seraing.
Chis de Haneffe fut ly uns des trois plus preus de ce paiis, et ly atre dos furent ly bons sires de
Hemericourt et ly bons Wafflars de Momale, si qu'il contient al comenchement de ce traitiiet. Chis
messires Thiris Tabereaz morit sains hoirs de son corps; se fist hoir de tout le sien le bon
monssaingnor Thiry, saingnor de Seraing, dont ilh estoit oncles, qui fut assi bannerés, dont chi après
sierat faite mention. Et, des V filhes, fut ly une mariée al viez monssaingnor Corbeal d'Awans; ly
seconde, al saingnor d'Argenteal; ly tirche, al saingnor de Bealfor sor Mouze; ly quarte, al saingnor
de Hamale; et ly Ve, à monssaingnor Godefroid de Hemericourt, saingnor de Herkes, deleis Tongres,
qui fut freires al bon saingnor de Hemericourt nomeit messire Wilhelme Macler. Chis messires
Godefrois out on fil, nomeit messire Wilhelme, qui morit sains hoir; et monssaingnor Moylerepas,
delle dukeit de Juley, robat le damme, dont ilh fut gran guerre.
|
- 1262
