| Notes |
- #Générale#Extrait du Miroir des Nobles de Hesbayes de jacques Hemricourt:
209. Ly ainsnée de ces sereurs fut mariée à monssaingnor Hombier Coirbeal d'Awans, secon de ce
nom, a cuy temps les werres d'Awans et de Warous commenchont, et en morit promiers, car ilh fut
tuweis al pongnyche à Lonchins; doqueil et de ses hoirs mention sierat chi après faite, en la
genealogie de monssaingnor Hombier d'Awans, qui fut fil do veilhe monssaingnor Breton de Warous.
775. Ly sires de Cleremont deseurnomeis soy mariat alle filhe do saingnor d'Awans, qui morit alle
pongniche à Lonchiens; s'en furent unk fis et trois filhes. Ly fis fut nomeis Corbeaz; se fut sires de
Cleremont, d'Awans et d'Esteneur, et soy mariat à damoyselle Maroie, filhe monssaingnor Colar
Bakenheme, chevaliers, qui fut sornomeis delle Grexhan, par tant qu'il demoroit en le maison c'on dit
le Crexhan, à Liege, en laqueile ilh avoit lonctemps vendut vin, car ilh estoit viniers anchois qu'il
presist l'ordenne de chevalerie, avoek laqueile femme ly dis Corbeal prist tres grande somme d'argent
et possessions plusseurs; et orent une filhe tant soilement, nomée Angnés, qui est à present abbeisse
de Milen, deleis Saintron; car ly dis Corbeaz soy governat sy petitement et tant indiscretement qu'il
morit povres et que, alle jour de son trespas, ilh n'avoit roy d'iretage ne chevanche nulle; et avoit le
nom qu'il estoit ly plus sages so l'atry conseilhe et qui miese savoit parleir et conselhier delle loys
que nus atres de ce paiis.
|
